തണ്ടർ ബേർഡിന്റെ പുതിയ മുഖം

റോയല്‍ എന്‍ഫീല്‍ഡ് സ്വന്തമാക്കണമെന്ന് ആഗ്രഹിക്കാത്തവരാരുമുണ്ടാകില്ല. കാരണം, അത്ര രാജകീയമാണ് അതിലെ യാത്ര. പ്രത്യേകിച്ച് തണ്ടര്‍ബേര്‍ഡ്. ക്ലാസിക്ക് ലുക്കിനൊപ്പം യാത്രാസുഖവും തണ്ടര്‍ബോര്‍ഡിനോടുള്ള ആരാധന കൂട്ടി. ഇപ്പോഴിതാ ക്ലാസിക് ലുക്കിന് ഒട്ടും കോട്ടം തട്ടാത്തവിധത്തില്‍ ന്യൂജനറേഷന്‍ ലുക്കിലേക്ക് മാറി ഓടുന്ന കാഴ്ചയാണ് തണ്ടര്‍ബേര്‍ഡില്‍. അത്തരമൊരു മാറ്റത്തിന് റോയല്‍ എന്‍ഫീല്‍ഡിനെ പ്രേരിപ്പിച്ച ഘടകം മറ്റൊന്നുമല്ല.

എന്‍ഫീല്‍ഡ് ബൈക്കുകള്‍ വാങ്ങി ഓള്‍ട്ടറേഷന്‍ നടത്തുന്നവരുടെ എണ്ണം കൂടിയതു തന്നെ. ഹാന്‍ഡില്‍ ബാറും സീറ്റും സൈലന്‍സറുമൊക്കെയാണ് പലരും പുതിയത് ഘടിപ്പിച്ചത്. ഇതോടെയാണ് ന്യൂജന്‍ ടേസ്റ്റിനൊത്തുകൂടി സഞ്ചരിക്കാന്‍ എന്‍ഫീല്‍ഡ് തീരുമാനിച്ചതെന്ന് വേണം പറയാന്‍.

തണ്ടര്‍ബേഡ് എക്‌സ് ആണ് ന്യൂജനറേഷനെ ആകര്‍ഷിക്കുന്ന ആ മോസ്റ്റ് മോഡേണ്‍ വണ്ടി. തണ്ടര്‍ബേര്‍ഡ് 350 എക്‌സ്, 550 എക്‌സ് മോഡലുകളിലൂടെയാണ് ആ മാറ്റം കൊണ്ടുവന്നത്. ഓള്‍ ബ്ലാക്ക് തീം, കറുപ്പഴകുള്ള ഫെന്‍ഡറും സൈഡ് പാനലുകളും എന്‍ജിനും സൈലന്‍സറും, ഹെഡ്ലാമ്പിനും ഇരട്ട മീറ്റര്‍ കണ്‍സോളിനും ചുറ്റമായി ക്രോമിയം തിളക്കം, ഒന്‍പതു സ്‌പോക്ക് അലോയ്വീല്‍...യുവാക്കളെ ആകര്‍ഷിക്കുന്ന ഒട്ടേറെ ഘടകങ്ങളുണ്ടതില്‍.

ഹെഡ്‌ലാമ്പിനുള്ളിലും കറുപ്പ് നിറമാണ്. ഓറഞ്ച്, നീല, വെള്ള, ചുവപ്പ് എന്നീ നിറങ്ങളിലാണ് ടാങ്ക്. ടാങ്കിന്റെ അതേ നിറത്തില്‍ അലോയ്വീലിലും കാണാനാകും. ഉയരം കൂടി വശങ്ങളിലേക്ക് നീങ്ങിനിന്ന ഹാന്‍ഡില്‍ ബാര്‍ മാറ്റി പുതിയ ഷോര്‍ട്ട് ബാര്‍ നല്‍കി. സിംഗിള്‍ പീസ് സീറ്റ്, ഗ്രാബ് റെയില്‍ എന്നിവയിലുമുണ്ട് ന്യൂജന്‍ മാറ്റങ്ങള്‍.

ഭംഗികൂട്ടാനുള്ള എല്ലാ മാറ്റങ്ങളും എന്‍ഫീല്‍ഡ് നടത്തിയിട്ടുണ്ട്. പക്ഷേ, എന്‍ജിനില്‍ മാറ്റമൊന്നും വരുത്തിയിട്ടില്ല. ഇപ്പോള്‍ നിരത്തിലോടുന്ന തണ്ടര്‍ബേര്‍ഡിലുള്ള അതേ എന്‍ജിന്‍ തന്നെയാണ് പുതിയതിലും. 19.8 ബിഎച്ച്പി കരുത്തും 28 എന്‍എം ടോര്‍ക്കുമേകുന്ന 346 സിസി എന്‍ജിനാണ് 350 എക്‌സിലുള്ളത്.

ദീര്‍ഘദൂര യാത്രകള്‍ക്ക് ഇണങ്ങിയതായിരുന്നു എന്നും എന്‍ഫീല്‍ഡ്. ഇനിയും അതിന് മാറ്റമുണ്ടാവില്ല. ഹാന്‍ഡില്‍ ബാറിലെ മാറ്റം കുറച്ചുകൂടി സവാരി സുഖം നല്‍കുന്നതാണ്. അതുകൊണ്ടുതന്നെ തണ്ടര്‍ബേര്‍ഡ് എക്‌സ് ദീര്‍ഘദൂര യാത്രയിലെ രാജാവാകുമെന്നുറപ്പ്. തണ്ടര്‍ ബേര്‍ 350 എക്‌സിന്റെ കൊച്ചി ഓണ്‍റോഡ് വില 1.75 ലക്ഷമാണ്. തണ്ടര്‍ബേര്‍ഡ് 500 എക്‌സിന് 2.22 ലക്ഷം രൂപയും വില വരും.